Сабыйларга

И сабыйлар, үсәсез дә, 
Тик үрнәкләр юк сезгә... 
Юллар алда, кайсы туры -
Сайларга үзегезгә... 

Зурларның эшләре каты, 
Бары акча эзлиләр... 
Әз генә авырлык килсә, 
Анысына да түзмиләр... 

Әнкәйләр белмиләр хәзер 
Нәрсә киеп-салырга... 
Әткәйләрнең уйлары бер: 
Тик машина алырга. 

Әби-бабай намаз белми, 
Акча санау - эшләре... 
Йокларга яткач та шуны 
Күрсәтәдер төшләре... 

И сабыйлар, үсегез сез, 
Туры юлны эзләгез... 
Уегыздан, телегездән 
Аллаһ сүзен өзмәгез...

Гел киресе

Әкрен барсам, өлгерәм мин, 
Ашыксам, соңга калам.
Бик агартырга тырышсам, 
Гел башка төскә манам. 

Очтым дигәндә, егылам, 
Килермен дисәң -качам.
Күзләреңне йом, дисәләр, 
Киресенчә, мин ачам.

«Этлек» эшләмәкче идем 
Мине кыскан гомергә... 
Аны яндырыйм дидем дә, 
Үзем калдым күмергә.

Тукайга

Дан, шөһрәт син көтмәгәнсең, 
Бәлеш өмет итмәгәнсең, 
Язгансың бары...

Милләтем диеп янгансың,
Йортсыз-җирсез дә калгансың,
Язгансың бары... 

Ятимлек тә сындырмаган, 
Сырхау җаның тындырмаган, 
Язгансың бары...

Тәүфыйксыздан син качкансың,
Иманлыга йөз ачкансың,
Язгансың бары.. 

Мәхәббәтең илгә чиксез, 
Рухи дәрьяларың төпсез, 
Язгансың бары...

Баш иябез шәхесеңә,
Сокланабыз һәр эшеңә
Ихлас күңелдән. 

Җаның булсын оҗмахларда, 
Бүген җырың дөньяларда 
Гөлгә күмелгән.